Të enjten është tërhequr shorti i plejofit për “Euro 2024” në Nyon të Zvicrës. Prej 12 përfaqësueseve, shortin më të vështirë e pati Bosnjë e Hercegovina.
Bosnja nuk pati aspak fat në short. Pas rezultateve të dobëta në kualifikime, Bosnjë e Hercegovina e ka fituar edhe një rast për të siguruar pjesëmarrjen në Evropian, falë rezultateve të mira në Ligën e Kombeve. Kështu që, në gjysmëfinale të plejofit të “Rrugës B”, Bosnja do të përballet me Ukrainën. Çifti tjetër është ai ndërmjet Izraelit dhe Islandës, ndërsa fituesit e këtyre gjysmëfinaleve do të përballen në finalen që dërgon në Evropianin e vitit të ardhshëm që mbahet në Gjermani.
Çiftet gjysmëfinale të “Rrugës A” janë Uellsi – Finlanda dhe Polonia – Estonia, ndërsa Gjeorgjia – Luksemburgu dhe Greqia – Kazakistani do të përballen në gjysmëfinalet e “Rrugës C” drejt Evropianit.
Ndeshjet gjysmëfinale do të zhvillohen më 21 mars të vitit të ardhshëm, ndërsa tri finalet që përcaktojnë edhe tri përfaqësueset e fundit të Evropianit, do të luhen më datën 26 mars.