Policia e Kosovës ka dhënë informacione shtesë sa i përket një shpërthimi të ndodhur të mërkurën në orët e hershme të mëngjesit në Prizren, ku mbetën të plagosur dhjetë persona, raporton teve1.info
Sipas një njoftimi publik, të dyshuar për aktivizimin e mjetit shpërthyes, i cili sipas Policisë është ende i panjohur, janë dy persona, njëri prej të cilëve është arrestuar dhe ndaluar për 48 orë, derisa tjetri është në kërkim.
Policia po ashtu ka njoftuar se para se të ndodhte shpërthimi në tregun e kafshëve në këtë qytet, ka pas një përleshje fizike në mes të tregtarëve.
“Në vendin e ngjarjes kanë dalë edhe njësiti i hetimeve rajonale të Prizrenit të cilët kanë administruar me prova dhe kanë mbledhur dëshmitë. Fillimisht janë dhënë informacione për tre persona të dyshuar që më vonë me zhvillimin e hetimeve policia ka gjetur se dy persona kanë qenë si kryes të veprës penale, të cilët janë identifikuar dhe policia ka filluar kërkimin për ndalimin e tyre, pasi pas një mosmarrëveshjeje të çastit ndërmjet tregtarëve të kafshëve fillimisht ka filluar një rrahje ndërmjet viktimave dhe të dyshuarve ku në një moment të dyshuarit aktivizojnë dhe hedhin një mjet shpërthyes (lloji i panjohur për momentin). Gjatë zhvillimit të operacionit për gjetjen dhe ndalimin e tyre ju njoftojmë se policia e Kosovës gjatë operacionit policor për këtë, përveç në vendin e ngjarjes ka kryer kontrolle edhe në komunën e Gjilanit, ku është lokalizuar i dyshuari R.M, i lindur ne vitin 1982, i cili është shoqëruar në polici për procedura të mëtejme hetimore dhe, me vendim të prokurorit të Shtetit ndalohet në afat prej 48-orë, ndërsa operacioni policor është duke vazhduar në kërkim të personit të dytë të dyshuari, ku janë realizuar bastisje në shtëpinë e tij. Policia rajonale në Prizren së bashku me prokurorinë e Shtetit është duke punuar që të sqarohet në tërësi rasti i ndodhur te tregu i kafshëve në Prizren, ndërsa për të gjitha të gjeturat do të ju mbaj të informuar”, thuhet në komunikatë.
Sipas Policisë, në këtë rast ishin lënduar dhjetë veta, pesë prej të cilëve ishin transportuar për trajtim mjekësor në QKUK në Prishtinë.
“Sot, me date 22.11.2023, rreth orës 04:50, policia ka pranuar informate për një rast te “Shkaktimit i rrezikut të përgjithshëm”, ku si pasojë ishin lënduar disa persona nja një mjet shpërthyes (lloji i panjohur për momentin), te tregu i kafshëve ne Prizren. Nga informatat e para është mësuar dhe dyshohet se 10 persona kane pësuar lëndime. Te gjithë te lënduarit fillimisht janë dërguar ne emergjencën e Spitalit Rajonal te Prizrenit duke ju ofruar trajtim mjekësor, ku pesë (5) prej tyre pas trajtimit lirohen për në shtëpi ndërsa pesë (5) tjerë transportohen për trajtim te mëtejmë ne QKUK”, thuhet në komunikatë.