Prokuroria Themelore në Prizren ka njoftuar se është arrestuar dhe i është caktuar masa e ndalimit një të dyshuari për gjuajtje me granatë të dorës mëngjesin e së mërkurës në Prizren, raporton teve1.info
Sipas komunikatës së Prokurorisë, deri më tani janë identifikuar tre të dyshuar për gjuajtje me granatë, një prej të cilëve është arrestuar dhe dy të tjerë janë në kërkim.
“Lidhur me rastin, tre persona të dyshuar janë identifikuar, njëri prej tyre është arrestuar dhe gjendet nën masën e ndalimit, ndërsa dy të dyshuarit tjerë janë në kërkim. Prokuroria dhe policia janë duke punuar intensivisht për kapjen e tyre”, thuhet në njoftimin e Prokurorisë.
Sipas komunikatës, rasti ka ndihur rreth orës 5:00 të mëngjesit.
“Prizren, 22 Nëntor 2023 – Prokuroria Themelore në Prizren, ju njofton se sot rreth orës 04:50 të mëngjesit ka ndodhur një shpërthim në Tregun e Kafshëve në Prizren. Nga ky shpërthim dhjetë persona kanë pësuar lëndime trupore, pesë prej tyre janë dërguar nê QKUK në Prishtinë për trajtim të mëtutjeshëm mjekësor, ndërsa pesë persona tjerë janë liruar në shtëpi pas trajtimit në Spitalin Rajonal të Prizrenit.
Në vendin e ngjarjes kanë dalë prokurori kujdestar dhe njësitë relevante policore për të hetuar rastin”, thuhet në komunikatë.
