Ballkani ka marrë rrugën në Kazakistanin e largët me qëllimin e qartë.
Kampioni i Kosovës në futboll do të dalë në fushë kundër Astanas për ta kompensuar humbjen që ekipi nga Kazakistani ia shkaktoi në Prishtinë. Më 26 tetor Astana e mposhti 2:1 Ballkanin në stadiumin “Fadil Vokrri”, në kuadër të xhiros së tretë të Grupit C të Ligës së Konferencës, derisa për Ballkanin ishte humbja e parë si vendas në garat evropiane këtë edicion, përfshirë edhe ndeshjet kualifikuese.
Disfata nga Astana erdhi pas një serie prej pesë fitoresh në po aq ndeshje si vendas, ku skuadra suharekase mposhti Dinamo Zagrebin, BATE Borisovin, Lincolnin, Larnen dhe Ludogoretsin, madje nuk ka pësuar as gol në “Fadil Vokrri”, deri në përballjen me Astanan.
Të enjten prej orës 16:30 Ballkani në stadiumin “Astana Arena” do të përpiqet ta mposht Astanan për të mbetur në garë që të avancojë nga faza grupore. Në fakt rezultati pozitiv në këtë përballje i jep shpresa Ballkanit për të kaluar tutje. Aktualisht, Ballkani ka tri pikë, sa i kanë edhe Dinamo e Astana pas tri xhirove të zhvilluara. Këto tri skuadra pritet të luftojnë për vendin e dytë në grup, i cili garanton kalimin në raundin tjetër. Në grup prin Viktoria Plzeni me nëntë pikë të tubuara. Deri në fund janë edhe tri xhiro, kështu që gara është plotësisht e hapur.
Pas ndeshjes ndaj Astanas, Ballkani e pret Plzenin në Prishtinë në fundin e nëntorit, saktësisht me 30 nëntor, ndërsa duelin e fundit do ta luajë në udhëtim ndaj Dinamos në Zagreb, më 14 dhjetor.
Për ekipin nga Suhareka ky është edicioni i dytë rresht që paraqitet në fazën e grupeve të Ligës së Konferencës. Edicionin e shkuar, Ballkani këtë fazë e mbylli në pozitën e fundit në grup, ku në gjashtë ndeshje të zhvilluara regjistroi një fitore, një barazim dhe katër humbje. Kundërshtarë të Ballkanit ishin Slavia Praga e Çekisë, Cluji i Rumanisë dhe Sivasspori i Turqisë.
