Kryeministri i Kosovës, Albin Kurti, thotë se që nga fillimi i mandatit janë angazhuar për përmirësimin e ambientit të të bërit biznes, kanë mbështetur ato dhe kanë inspektuar tregun.
Kurti, thotë se 322 bizneseve i kanë dhënë përkrahje financiare përmes granteve në vlerë prej 11.8 milionë euro.
“322 bizneseve i dhamë përkrahje financiare përmes granteve në vlerë 11.8 milionë euro dhe subvencionuam kreditë për 395 biznese tjera në vlerë 12.4 milionë euro. Krahas tyre, me 2.8 milionë euro, mbështetëm dhe 226 ndërmarrje vendore në promovimin e produkteve, mallrave dhe shërbimeve në 33 panaire ndërkombëtare. Për më shumë hapësirë për kreativitet dhe inovacion për të rinjtë dhe kompanitë e reja, mbështetëm me 8 milionë euro Parkun e Inovacionit dhe Trajnimit (ITP) në Prizren. Kurse për më shumë hapësirë për bizneset, ndërtuam infrastrukturë fizike me investim kapital në vlerë 2.5 milionë euro në parqet industriale në Vushtrri, Suharekë, Viti, Lipjan dhe Rahovec”, thuhet në postimin e Kurtit në Facebook.
Kurti, tutje ka thënë se kanë shënuar rekord të inspektimeve brenda vitit 2022 nga Inspektorati i Tregut.
“U shënua rekord i inspektimeve brenda vitit 2022 nga Inspektorati i Tregut, gjithsej 2830. Me trendin aktual të inspektimeve të këtij viti, deri në fund të vitit 2023 parashihet që të arrihet rekord i ri i numrit të inspektimeve vjetore. Inspektimet kanë rritur mbikëqyrjen. Mbikëqyrja, krah për krah me zvogëlimin e barrës administrative dhe thjeshtimin e procedurave për pajisje me leje dhe licensa, ka rezultuar me formalizim të tregut. Gjatë kësaj kohe janë licensuar 500 operatorë ekonomikë për shitjen e derivateve të naftës, të cilët deri më tani ishin të pa licencuar”, ka shkruar tutje kryeministri.
Ndërkohë, për situata të jashtëzakonshme, kur tregu çrregullohet nga faktorë të jashtëm , Kurti thotë se kanë pasuruar rezervat e shtetit për 30-fish.
“E për situata të jashtëzakonshme, kriza e emergjenca, atëherë kur tregu çrregullohet nga faktorë të jashtëm, pasuruam rezervat tona shtetërore për 30-fish. Për më shumë siguri për qytetarët tanë, për më shumë siguri kombëtare”./teve1.info/
