Minatori i Trepçës, Esat Meha ka apeluar te institucionet e vendit që të nxjerrin nga greva kolegët e tij minatorë, të cilët tash e nëntë ditë ndodhen në minierë.
I ftuar në emisionin “Këndi i Debatit”, Meha tha se grevistët tash e nëntë ditë janë 800 metra nën thellësi të tokës, derisa i përlotur tha se të njëjtit nuk i kanë takuar qe sa ditë as familjarët e tyre.
“Ne apelojmë prej sonte këtu, prej këtij emisioni, që ta gjejmë një njeri, ta gjejmë një trup që të shkon e ti nxjerrë shokët tonë, vëllezërit tonë prej grevës, në horizontin e dhjetë qe nëntë netë. Ne jemi ardhë këtu, por jemi ardhë me gjysmë shpirti, me gjymsë trupi. Mu më dhimbsen ata kolegë se e dimë çfare janë dhe çfarë kontributi e kanë dhënë. Qe nëntë netë mos me shku askush në shtëpi me u taku me anëtarët e familjes së vet, çka mendojnë institucionet e Kosovës a është lehtë të qëndrosh në minierë 800 metra thellësi edhe mos me e pa familjen. A është lehtë t’ia ndash kafshatën e bukës minatorit, ta ndëshkosh për çfarë arsye, a ka arsye dikush të ia ndalë pagën minatorit”, tha Meha në Tëvë1.
Tutje Meha tregoi se tashmë është suspenduar për shkak se siç tha ai, ushtruesi i detyrës së kryeshefit Enis Abdurrahmani, e ka etiketuar atë si anëtarë të kryesisë së sindikatës.
“Çysh iu duket me vendimin që e e ka marrë ushtruesi i detyrës për suspendimin e minatorëve. që do me thënë i ka etiketu. Edhe një anëtarë për shembull që është anëtarë i sindikatës e që është minatorë siç unë jam për shembull, që më ka etiketu e thotë është anëtarë i kryesisë së sindikatës. Unë nuk i largohem sindikatës, unë jam anëtarë i sindikatës, nuk jam anëtarë i kryesisë së sindikatës. Mua përsonalisht më ka quajtë je anëtar i kryesisë së sindikatës dhe më ka suspendu. Unë mburrem që më ka suspendu se minatorët e Trepçës e dinë kush kam qenë, kush jam, për atë por edhe unë ndoshta do ta padisë pse më ka shti në atë radhë”, shtoi ai
Kujtojmë që menaxhmeti i “Trepçës” të hënën ka suspenduar nga puna përkohësisht punëtorët e “Trepçës” Ibrahim Jonuzi, Fevzi Ademi, Destan Kërleshin, Gani Osmanin dhe Esat Mehën../teve1.info./