Gani Osmani, ish – kryesindikalist në Trepçë ka thënë se shëndeti i minatorëve grevistë çdo ditë e më shumë është duke u rrezikuar.
Osmani madje tha se që nga data 24 tetor kur edhe ka filluar greva e deri më sot, ndihmë mjekësore kanë kërkuar 350 minatorë.
“8 orë është tepër, se jo me zgjatë më shumë. Shëndeti i tyre çdo ditë rrezikohet, do më thënë si të kalon çdo ditë më shumë. Për shembull ditën e parë nuk ka kërkuar ndihmë askush, në ditën e pestë kanë kërku 20 veta, në të shtatën ditë 100 veta, do me thënë shëndeti vazhdimisht rrëndohet. Ne jemi dëshmitarë aty që i kemi pa, ka pasë rast punëtorët kanë dalë të alivanosur, i kanë qu në Shtëpi të Shëndetit. Unë kam marrë shënimet prej 24 deri më sot, 350 veta kanë kërku ndihmë prej mjekëve. Ajo ndihma mjekësore mundet me qenë edhe për shembull tensioni shumi i lartë, ndonjë ineksion apo infuzion. Prej këtyre afër 30 kanë përfundu në Spitalin e Mitrovicës edhe në Emergjencë”, tha Osmani në emisionin “Këndi i Debatit” në Tëvë1.
Tutje ish-kryesindikalisti tha se nuk ka kushte për grevë brenda minierës, pasi sipas tij, në 50 metër katrorë po qëndrojnë 200 punëtorë.
“Prej atyre 350 vetave për çdo ditë është gjendja më e vështirë. Ne i shohim edhe janë kushtet asisoji që shëndeti rrezikohet, do me thënë është lagështia shumë e madhe, është një hapësirë me 50 metër katrorë janë 200 veta, nuk ka vend të përshtatshëm për me ndejtë. Edhe ajri është i dobët, mu për këtë shkak vjen deri te rrezikimi i shëndetit të tyre”, shtoi Osmani.
Kujtojmë që minatorët e Trepçës kanë hyrë në ditën e nëntë të grevës.
Numri i minatorëve të Trepçës të cilët po kërkojnë ndihmë mjekësore po vazhdon të rritet.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve./teve1.info./
