Vizitën parë e nisi në Shkup për ta vazhduar më pas në Prishtinë.
Presidentja e Komisionit Evropian, Ursula von der Leyen, në Prishtinë u prit nga Presidentja e vendit, Vjosa Osmani dhe kryeministri Albin Kurti.
Von Der Leyen, dha mesazhe të qarta se Bashkimi Evropian është i hapur për zgjerim me vendet e Ballkanit Perëndimor.
Shefja e Komisionit Evropian para gazetarëve foli edhe për çështjen e dialogut mes Kosovës dhe Serbisë.
Ajo i ka bërë thirrje Kosovës që të fillojë me zbatimin e Asociacionit të Komunave me shumicë serbe, kurse Serbia ta pranoj njohjen de-facto.
“Ne kemi një plan të ri të investimeve dhe ky plan është duke funksionuar shumë mirë. Nëse funksionon për shtetet anëtare të BE-së do të funksionojë edhe te vendet e Ballkanit Perëndimor. Ky plan ka mundësinë që brenda një dekade të dyfishojë të ardhurat tuaja. Të gjitha këto suksese arrihen vetëm nëse Kosova dhe Serbia normalizojnë marrëdhëniet e tyre. Kosova duhet të pranojë draftin për Asociacionin, kurse Serbia duhet të pranojë një njohje de facto dhe dialogu i BE-së është i angazhuar në bisedime. Kjo është mënyra e vetme për të shkuar para”, tha presidentja e komisionit Evropian, Ursula von der Leyen.
Kurse, Presidentja e vendit, Vjosa Osmani, deklaroi mes tjerash se Serbia ka ambicie destabilizuese, kurse Kosova sipas saj është treguar pala konstruktive në dialog.
Ajo tutje kërkoi nga blloku evropian qe t’i largojë masat ndëshkuese ndaj Kosovës.
Pas takimit me Osmanin, Von Der Leyen u takua me shefin e ekzekutivit kosovar, Albin Kurtin.
Ky i fundit përmes një komunikate, mes tjerash kërkoi ekstradimin e Milan Radoicicit në Kosovë që të ballafaqohet me drejtësinë.
“Në lidhje me sulmin terrorist, paramilitar dhe kriminal të 24 shtatorit, kryeministri Kurti theksoi rëndësinë dhe nevojën e ekstradimit të Milan Radoicic në Kosovë ku do të ballafaqohej me një gjykim fer dhe të drejtë për veprat e tij, dhe në të njëjtën kohë domosdoshmërinë e sanksioneve ndaj Serbisë në mënyrë që sulme të tilla mos përsëriten”, thuhet në komunikatën e Qeverisë.
Von Der Leyen pas vizitës në Prishtinë, ka udhëtuar për në Beograd ku do të takohet me presidentin serb, Aleksandar Vuçiq dhe kryeministren Ana Brnabiq.