Kuvendi i Kosovës sot do të mbajë seancë të veçantë.
Kryesia e Kuvendit gjatë së hënës vendosi që kjo seancë të nisë në orën 11:00.
Deputetët e Kuvendit do të debatojnë rreth miratimit të “Deklaratës në mbështetje të Rezolutës së Parlamentit Evropian, e datës 19 tetor 2023, mbi zhvillimet e fundit në dialogun Serbi-Kosovë, përfshirë situatën në komunat veriore të Kosovës (2023/2880(RSP)”.
Teksti i kësaj rezolute që u votua në seancën plenare të 19 tetorit, është përpiluar duke marrë parasysh disa propozime të grupeve politike në PE.
“Dënojmë në mënyrën më të fuqishme të mundshme sulmin qyqar terrorist ndaj pjesëtarëve të Policisë së Kosovës nga ana e paramilitarëve mirë të organizuar serbë në Banjskë, në veri të Kosovës”, thuhet në tekstin e rezolutës.
