Ushtruesi i detyrës së drejtorit në ndërmarrjen “Trepça”, Bujar Jashari bën të ditur se sot do të ekzekutohet pjesa e mbetur e pagës për minatorët, të cilët janë në ditën e dytë të grevës.
Në një përgjigje për Tëvë 1, Jashari thotë se bordi dhe qeveritarët nuk i kanë vizituar minatorët, pavarësisht thirrje dhe kërkesave.
“Pjesa e mbetur e pagës sot do të del, ashtu e kam edhe njoftim. Kemi bërë thirrje tek të gjitha institucionet që të vijnë dhe t’i vizitojnë, kemi bërë edhe shkresa, kam bërë disa njoftime për kërkesat e tyre edhe nga bordi por fatkeqësisht momentalisht nuk kemi pasur ndonjë vizitë nga ana e bordit apo ndonjë qeveritari tonë”, deklaroi ai.
Tutje ai theksoi se për shkak të përkeqësimit të situatës shëndetësore, dy punëtorë janë dërguar në spital, ndërsa 50 të tjerë kanë marrë trajtim mjekësor brenda minierës.
Sipas raportimit të Tëvë 1, mëngjesin e sotëm një minator është alivanosur derisa po qëndronte në grevë në minierën Horizonti 10, në 800 metra thellësi.
Minatorët e ndërmarrjes “Trepça” janë futur në ditën e dytë të grevës së urisë, si shenjë proteste për vonesat që po u bëhen në ekzekutimin e pagave.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve. /Teve1.info/
“Gjendja shëndetësore po u rëndohet”, minatorët e Trepçës hyjnë në ditën e dytë të grevës së urisë