Presidenti i Serbisë, Aleksandar Vuçiq, thotë se qëllimi i pesëshes së diplomatëve është që Serbia ta njohë Kosovën.
Kështu deklaroi Vuçiq, pas takimit të djeshëm të pesëshes diplomatike që vizituan Kosovën e më pas Serbinë.
“Natyrisht gjithçka për Kosovën e M. për ne është shumë e vështirë. Njerëzit mendojnë se e gjithë kjo është vetëm për shkak të Banjskës, por nuk është. Ajo ishte vetëm taktikisht e tmerrshme për ne dhe ka pasoja të caktuara, por në një kuptim strategjik, qëllimi i vetëm i tyre është që ta njohim Kosovën”, ka thënë Vuçiq, raporton mediumi serb b92.
Sipas tij, Serbia do të gjejë një rrugëdalje dhe se do të “vazhdojnë ta ruajnë thelbin e interesave kombëtare”.
Vuçiq ka bërë të ditur se të enjten dhe të premten do të shkojë në Bruksel dhe se “do të merret me të gjitha pengesat që i kanë vendosur Serbisë”.
Gjatë ditës së shtunë, pesëshja diplomatike vizitoi Kosovën dhe Serbinë, ku pesëshja ishte nën udhëheqjen e emisarit të Bashkimit Evropian për dialogun Kosovë – Serbi, Miroslav Lajçak, si të pranishëm ishin i dërguari amerikan për Ballkanin Perëndimor, Gabriel Escobar, dhe këshilltarët e lartë të liderëve të Gjermanisë, Francës dhe Italisë./teve1.info/
