Laçi mposht edhe Skënderbeun, duke regjistruar suksesin e dytë radhazi nën drejtimin e Mirel Josës.
Bardhezinjtë fituan 2-0 përballë Skënderbeut dhe tash renditen në vendin e dytë me 13 pikë, po aq sa numëron edhe Tirana.
Braziliani William Cordeiro zhbllokoi takimin në fundin e pjesës së parë (42’) falë një goditjeje të fortë dhe të saktë me të djathtën.
Kurbinasit shënuan edhe të dytin në minutën e 56’. Gjuajtja e Klinti Qatos u ndal në shtyllë dhe Ronald Sobowale përfitoi nga topi i rikthyer.
Duke e dërguar qetësisht në rrjetë. Gol që vulosi fitoren e vendasve, teksa ky ishte realizimi i pestë në Superiore për sulmuesin kryesor të Laçit.
Bardhezinjtë parakalojnë Skënderbeun në renditje dhe tashmë ndodhen tri pikë larg Egnatias kryesuese. Ndërkohë që korçarët e Ivan Gvozdenovic rikthehen te humbja pas dy fitoreve radhazi dhe renditen të katërtët me 12 pikë.