Kryeministri, Albin Kurti ka thënë se ndihet thellësisht i pikëlluar për aksidentin tragjik në Mestre të Italisë, ku mbeten të vdekur 21 persona.
Kurti i ka shprehur ngushëllime popullit italian.
“I pikëlluar thellësisht nga aksidenti tragjik i autobusit të mbrëmshëm në Mestre të Italisë, i cili mori jetën e të paktën 21 personave të disa kombësive, përfshirë. 2 femije. I shpreh ngushëllimet e mia kryeministrit @GiorgiaMeloni dhe të gjithë të prekurit teksa vajtojnë të ndjerin dhe kujdesen për të lënduarit”.
Ndryshe, një aksident i rëndë automobilistik është shënuar mbrëmjen e së martës në Mestre, një provincë e Venezia në Itali.
Një autobus me pasagjerë doli nga rruga dhe ra mbi shinat e një hekurudhe aty pranë duke shpërthyer në flakë.
Mediat italiane raportojnë se të paktën 21 persona kanë humbur jetën, 2 prej të cilëve fëmijë, ndërsa dhjetëra të tjer janë plagosur.
Autobusi, i cili mësohet se ishte i linjës, ra nga të paktën 10 metra lartësi.
Në vendin e ngjarjes ndodhen shërbime të shumta zjarrfikëse, ambulanca dhe policia. Po ashtu, mediat fqinje shkruajnë se në gjendje gatishmërie janë vënë të gjitha spitalet që ndodhen pranë.
