Zhvillimet e fundit në veri të Kosovës do të diskutohen sot në Parlamentin Evropian në Strasburg.
Eurodeputetët do të diskutojnë për marrëdhëniet midis Prishtinës dhe Beogradit me Komisionin dhe Këshillin, pas situatës së krijuar së fundmi në veri, përcjell teve1.info
Ndërkaq më vonë këtë muaj, Parlamenti Evropian (EP) pritet ta miratojë një rezolutë të jashtëzakonshme për marrëdhëniet mes Kosovës dhe Serbisë.
Më 24 shtator, Policia e Kosovës u sulmua nga një grup kriminelësh serbë në Banjskë të Zveçanit, me ç’rast mbeti i vdekur rreshteri Afrim Bunjaku.
Ministri i Punëve të Brendshme, Xhelal Sveçla ka njoftuar dje se do të paraqes dëshmi të reja që tregojnë se në sulm janë përfshirë presidenti i Serbisë, Aleksandar Vuçiq, ministri i Mbrojtjes së Serbisë dhe shefi i komandës së ushtrisë së Serbisë.
Siç ka bërë të ditur ai, përgatitjet e sulmit janë bërë në bazën e trajnimeve ushtarake që gjendet afër Kopaunikut.
Sulmet ndaj Policisë së Kosovës janë dënuar nga Shtetet e Bashkuara dhe Bashkimi Evropian dhe është bërë thirrje që fajtorët të sillen para drejtësisë. /Teve1.info/
