Katër raste të dhunës në familje janë raportuar gjatë 24 orëve të fundit në disa qytete të Kosovës, sipas raportit 24-orësh të Policisë.
Në Lipjan, të enjten, rreth orës 16:00, një grua dyshohet se ka ushtruar dhunë ndaj një gruaje tjetër.
E dyshuara është dërguar në stacion policor për intervistim dhe, me vendim të prokurorit, është liruar në procedurë të rregullt.
Rasti po vazhdon të hetohet.
Një rast i sulmit dhe dhunës në familje është raportuar edhe në Ferizaj, të enjten, rreth orës 22:30.
Sipas Policisë, pas një mosmarrëveshjeje, një grua është sulmuar nga një burrë.
Nuk raportohet për persona të lënduar, ndërsa pas intervistimit të palëve, me vendim të prokurorit, rasti do të vazhdojë në procedurë të rregullt.
Në Pejë, të enjten, rreth orës 15:51, është arrestuar një grua e dyshuar se pas një mosmarrëveshjeje ka fyer një grua tjetër dhe ka thyer një xham.
Sipas raportit, nuk ka persona të lënduar.
Me vendim të prokurorit, e dyshuara është dërguar në mbajtje.
Ndërkaq, në Gjakovë, lidhur me një rast të dhunës në familje të raportuar më 21 tetor, është arrestuar më 22 tetor një burrë, shtetas i Serbisë.
Me vendim të prokurorit, ai është dërguar në mbajtje./teve1.info/
