Kryeministri i Kosovës, Albin Kurti në Kuvendin e Kosovës tha se të dielën e 24 shtatorit përjetuam sulm agresor të bandave terroriste të Serbisë ndaj shtetit e Republikës së Kosovës.
Kurti tha se ishte ditë e rëndë për vendin dhe mbarë kombin.
Derisa theksoi se vrasja e rreshterit Bunjaku u kthye në angazhim për luftimin e bandave terroriste dhe në fitore të betejës nga Policia e Kosovës.
“Me të zbardhur drita u pa se çfarëdo grupe terroriste nuk kanë kurfarë shanse me Policinë e Kosovës. Ata u vranë, u arrestuan, ose po ndiqen sepse janë në ikje. Sulmuesit që arritën të ikin duhet të ekstradohen dhe të dorëzohen në organet e Republikës së Kosovës, organizatat Mbrojtja civile dhe Brigada veriore duhet të shpallen organizata terroriste edhe nga shtetet tona mike aleate”, tha Kurti.
Tutje kryeministri theksoi se shteti i Serbisë duhet të ndëshkohet edhe nga ndërkombëtarët për këtë sulm terrorist sepse sipas tij, nëse kjo nuk ndodh Serbia do ta përsërisë krimin.
“Për këtë akt të agresionit ndaj Kosovës, Serbia duhet të sanksionohet e ndëshkohet ndërkombëtarisht. Nëse kalon e pandëshkuar atëherë ajo do ta përsërisë krimin”, tha Kurti./teve1.info./