Gjykata Themelore në Prishtinë, ka caktuar masën e paraburgimit prej 30 ditësh ndaj të dyshuarve serb, të cilët dyshohen për sulmin terrorist të së dielës në Banjskë.
Lajmin e ka konfirmuar avokati i të dyshuarit Dushko Maksimoviq, Dejan Vasiq.
I njëjti tha se ndaj këtij vendimi, do të ushtrojnë ankesë në Gjykatën e Apelit.
Ndryshe, Prokuroria Speciale e Kosovës kishte kërkuar që ndaj të arrestuarve të caktohet masa e paraburgimit.
Një grup i armatosur, që sipas autoriteteve përbëhej prej rreth 30 personash, sulmuan Policinë e Kosovës në Banjskë të Zveçanit më 24 shtator, duke lënë të vrarë rreshterin Afrim Bunjaku.
Lajmi është bërë i ditur edhe nga Gjykata Themelore e Prishtinës.
“Gjykata Themelore në Prishtinë, Departamenti Special ka mbajtur seancën dëgjimore, duke vendosur lidhur me kërkesën e Prokurorisë Speciale të Republikës së Kosovës për caktimin e masës së paraburgimit në çështjen penale kundër të pandehurve B.S dhe D.M, të dyshuar për vepra të rënda kundër rendit kushtetues dhe sigurisë së Republikës së Kosovës nga neni 126 i KPKS – së dhe kryerja e veprave terroriste nga neni129 i Kodit Penal të Republikës së Kosovës. Gjyqtari i Procedurës Paraprake e ka aprovuar si të bazuar kërkesën e Prokurorisë Speciale të Republikës së Kosovës për caktimin e masës së paraburgimit kundër të pandehurve B.S dhe D.M dhe të njëjtëve iu ka caktuar masën e paraburgimit në kohëzgjatje prej 1 (një) muaji, për secilin”, thuhet në komunikatë.
Të pandehurve B.S dhe D.M iu është caktuar masa e paraburgimit në harmoni me nenin 182 të KPPRK dhe nenin 184 paragrafi 1 nën paragrafi 1.1 e 1.2 pika 1.2.1, 1.2.2 dhe 1.2.3 dhe paragrafit 1.3 të KPPRK-së. /teve1.info./
Dy pjesëtarët e grupit që kryen sulm terrorist arrijnë në gjykatë, prokuroria kërkon paraburgim
