UEFA ka qenë me dorë të lehtë në dënimin e Rumanisë në ndeshjen ndaj Kosovës, e cila u ndërpre për shkak të mesazhit “Kosova është Serbi”.
Federata rumune ka publikuar vendimin e UEFAs, e cila kishte hapur procedurë disiplinore. Federata rumune ka marrë një gjobë prej 51 mijë eurosh dhe një ndeshje si vendase pa shikues. Bëhet fjalë për duelin me Andorrën, i cili luhet muajin tjetër në kuadër të “Euro 2024”.
Pas vendimit te UEFAs, federata ka dënuar incidentin në ndeshjen me Kosovën, e cila u ndërpre për 50 minuta. Po ashtu, ajo ka dënuar ashpër edhe mesazhet provokuese. Akuzat që renduan rumunët ishin: Shfaqja dhe brohoritja e mesazheve politike, sjellja raciste e tifozëve, ndezja e fishekzjarrëve, hedhja e gjësendeve në tokë dhe bllokimi i zonave të aksesit publik.
Megjithatë, FRF ka vendosur të lejojë qasje falas për fëmijët nën 14 vjeç, të organizuar në grupe, nga mjediset e arsimit parashkollor dhe shkollor, shkollat e futbollit, grupet e të rinjve të klubeve të futbollit, me vetëm një shoqërues për grup me 10 fëmijë.
Federata Rumune e Futbollit gjithashtu ka shtuar se hedh poshtë sjelljen e papërgjegjshme të grupit të shikuesve nga tribuna jugore që çoi në ndërprerjen e ndeshjes me Kosovën dhe ripërsërit parimin sipas të cilit qeveriset futbolli në Rumani, përkatësisht mosndërhyrja e politikës në sport.
Gjithashtu, FRF ka thënë se dënon ashpër mesazhet provokuese me karakter politik, ideologjik, fetar apo fyes, të cilat janë kategorikisht të ndaluara në stadiume.
