Ambiguiteti ose dykuptimësia është njëra nga elementet e cila besohet që po shkakton probleme në zbatimin e marrëveshjes mes Kosovës dhe Serbisë. Kjo dykuptimësi, sipas ekspertëve, nuk duhet të jetë problem për Kosovën dhe se vendi duhet të vazhdoi tutje me zbatimin. Por, ka mendime që ambiguitetin në vazhdimësi politika e Kosovës e ka përdorur për nevoja të veta.
Marrëveshjet e arritura mes Kosovës dhe Serbisë, vazhdimisht kanë pasur dykuptimësi brenda përmbajtjes së tyre.
Kjo formë e përpilimit të dokumenteve në diplomaci njihet ndryshe edhe si “ambiguiteti kreativ”. Një ambiguitet i tillë është i shprehur edhe në marrëveshjen e arritur mbi bazën e planit franko-gjerman.
Termi “vetë-menaxhim” i përmendur në nenin 7 të marrëveshjes, pati ngjallur reagime të shumta në vend, pasi kuptimi i tij interpretohej në forma të ndryshme.
Njohësi i çështjeve politike, Melazim Koci, thotë se ambiguiteti mund të jetë njëri nga shkaktarët që nuk po zbatohet plani franko-gjerman. Por, sipas tij, Kosova duhet të përmbush zotimet e veta.
“Nëse shikohet nga aspekti ynë, ai ka ambiguitet, por unë do ta kisha quajtur ambiguitet konstruktiv. Përse? Sepse, ai është i konceptuar ashtu që asnjëra palë të mos mund ta bllokoi. Do të thotë nëse Kosova do të përmbushte pjesën e obligimeve të veta, Serbia nuk mund ta bllokoi atë marrëveshje, sepse Serbia nuk e ka të drejtën e vetos në atë marrëveshje. Identike ka qenë situata në Rambuje”, u shpreh njohësi i Çështjeve politike, Melazim Koci.
Ndërsa, analisti nga Shqipëria, Ben Andoni, thotë se kryeministrat në Kosovë, çdoherë e kanë përdorur ambiguitetin për të përfituar në politikën e brendshme.
“Shumë individë nga ekzekutivi i Kosovës dhe këtu kam në kokë zotëri Haradinajn, zotëri Hotin, zotëri Kurtin tani, më përpara ish-kryetarin e LDK-së, gjithmonë janë munduar të fitojnë nga ky lloj ambiguiteti dhe ta përdorin për politikën e brendshme … Politikanët në Kosovë e dinë shumë mirë, këshillohen shumë mirë, por duket që këto lloj ambiguiteti e shfrytëzojnë për interesat e tyre”, u shpreh analisti nga Shqipëria, Ben Andoni.
Qartësimin e mënyrës së zbatimit të marrëveshjes palët kanë mbetur ta bëjnë në Bruksel, përmes planit të sekuencimit.