Kanada ka kompletuar katërshen e skuadrave që do të paraqiten në gjysmëfinale të Botërorit të basketbollit. Kanadaja, të mërkurën është bërë përfaqësuesja e fundit që ka avancuar në gjysmëfinale, pasi në Manila të Filipineve mposhti Slloveninë me shifrat 100:89.
Ndeshja mes Kanadasë dhe Sllovenisë ishte dramatike, por kanadezët shkëputjen e bënë në çerekun e tretë. Pas dy çerekëve të parë, rezultati ishte 50:50, ndërsa periudhën e tretë, Kanadaja e fitoi me shifrat 30:21.
Përkundër se Sllovenia e fitoi dhjetë minutëshën e fundit, kjo nuk mjaftoi për ta evituar humbjen dhe eliminimin nga Kanadaja. Shai Gilgeous-Alexander me “double-double” udhëhoqi Kanadanë drejt fitores.
Ai ndeshjen e përfundoi me 31 pikë e 10 kërcime, ndërsa RJ Barrett shtoi 24 pikë e 9 kërcime për fitoren e kanadazëve. Luka Donçiq ishte më i dalluari te Sllovenia me 26 pikë, 4 kërcime e 5 asisime, ndërsa Klemen Prepeliq shtoi 22 pikë. Seria e ndeshjeve gjysmëfinale nis të premten. Derisa në gjysmëfinale, Kanadaja do të përballet me Serbinë.