Puna në Ministrisë së Industrisë, Ndërmarrësisë dhe Tregtisë, të premten, nuk ka nisur si zakonisht. Aty, kanë zbarkuar policia dhe ekipet e hetuesisë dhe si rezultat, janë arrestuar tre persona nën dyshimin për keqpërdorim me rezervat shtetërore.
Policia e Kosovës – Njësia e Veçantë e Hetimeve, me urdhër të Prokurorisë Speciale të Republikës së Kosovës, ka realizuar bastisje në lokacione të ndryshme në Prishtinë, ku kanë arrestuar tre persona, Hafiz Garën, Irfan Lipovicën dhe Ridvan Muharremin.
Bastisjet u zhvilluan në hapësirat e ministrisë së Industrisë, Ndërmarrësisë dhe Tregtisë, në lokalin “Bukë e Zemër” që është pronë e Muharremit dhe në banesën e tij.
I arrestuari Hafiz Gara, është drejtori i Departamentit për Rezervat Shtetërore të Mallrave, në Ministrinë e Industrisë, Ndërmarrësisë dhe Tregtisë.
Ndërsa i arrestuari tjetër, Irfan Lipovica, mbanë pozitën e drejtorit të Departamentit për Integrim Evropian dhe Koordinim të Politikave në po këtë ministri.
Gjatë ditës është arrestuar edhe Ridvan Muharremi, i cili dyshohet për “Dhënie të ndihmës në kryerjen e veprës penale të Keqpërdorimit të detyrës zyrtare”. Muharremi u arrestua në restorantin e tij.
Me anë të një komunikate për media, Prokuroria Speciale ka dhënë detaje për aksionin e sotëm.
“Prokuroria Speciale njofton opinionin publik se tre personat e arrestuar, R.M. H.G dhe I.L. dyshohen për veprat ‘’Keqpërdorim i detyrës zyrtare’’, si dhe ‘’Dhënie të ndihmës në kryerjen e veprës penale të Keqpërdorimit të detyrës zyrtare’’. Ndërkaq, gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore. Të njëjtit me urdhër të Prokurorit të Shtetit, do të dërgohen në mbajtje për 48 orë, si dhe brenda afateve ligjore kohore do të bëhet kërkesë për caktimin e paraburgimit”.
Para se të arrestohej, për bastisjen në pronat e Muharremit, ka folur avokati i tij, Mahmut Halimi.
Ky aksion vije pas publikimit të disa incizimeve për ‘skandalin e grurit dhe vajit’, që u bënë nga gazeta Nacionale.
