Kryeministri i Kosovës, Albin Kurti, është shprehur i emocionuar për anëtarësimin e Kosovës në iniciativën e Partneritetit për Qeverisje të Hapur (Open Government Partnership).
Kurti ka thënë se Partneriteti për Qeverisje të Mirë përfshin 76 qeveri nacionale dhe 104 qeveri lokale
“I emocionuar për të njoftuar se Kosova i është bashkuar Partneritetit për Qeverisje të Hapur, një nismë ndërkombëtare që përfshin 76 qeveri kombëtare dhe 104 qeveri lokale dhe nxit transparencën, llogaridhënien dhe qasjet novatore për angazhimin publik”, ka shkruar Kurti, në platformën X.
Thrilled to announce that Kosova has joined the Open Government Partnership (@opengovpart), an international initiative that includes 76 national & 104 local governments and fosters transparency, accountability & innovative approaches to public engagement.
— Albin Kurti (@albinkurti) August 12, 2023
Lajmin se Kosova është bërë anëtarja më e re e Open Government Partnership e ka bërë të ditur ministri i Administrimit të Pushtetit Lokal, Elbert Krasniqi.
Krasniqi, ka thënë se përmes kësaj organizate Kosova i bashkohet kombeve të botës demokratike.
“I lumtur të ndaj lajmin se Kosova është bërë anëtarja më e re në Open Government Partnership. Ne, përmes kësaj organizate i bashkohemi kombeve të botës demokratike, duke u zotuar mbi parimet e përbashkëta për qeverisje të hapur, të përgjegjshme dhe inovative duke u angazhuar për rritjen e pjesëmarrjes së qytetarëve në vendimmarrje”, ka shkruar Krasniqi në njoftimin e tij në Facebook.
Partneriteti për Qeverisje të Hapur (OGP) është një iniciativë shumëpalëshe që synon të sigurojë angazhime konkrete nga qeveritë kombëtare dhe nën-kombëtare për të promovuar qeverisjen e hapur, për të fuqizuar qytetarët, për të luftuar korrupsionin dhe për të shfrytëzuar teknologjitë e reja për të forcuar qeverisjen./teve1.info/
