Të enjten në Gjykatën Themelore në Prishtinë, në seancën fillestare i akuzuari Zlatan Arsic është deklaruar i pafajshëm lidhur me akuzat për krime lufte.
Një deklarim të tillë, ai e ka bërë pas leximit të aktakuzës nga prokurori special, Atdhe Dema, raporton “Betimi për Drejtësi”.
Arsic akuzohet se në periudhën shkurt- mars 1999, të dëmtuarin B.M e ka torturuar në mënyrë ç‘njerëzore, maltretuar dhe duke i shkaktuar lëndime të rënda trupore, traumë dhe pasoja në shëndet.
Ai, po ashtu, akuzohet se ka marrë pjesë në dëbimin dhe shpërnguljen me dhunë të qytetarëve të Kamenicës me rrethinë, pastaj kanë filluar të bëjnë plaçkitjen e shtëpive, e me pas me qëllim të dëmtimit të pronës së shqiptarëve ia kanë vënë zjarrin, po ashtu kanë marrë pjesë në keqtrajtimin e civilëve shqiptarë.
I akuzuari Arsic deklaroi që nuk ndihet fajtor për asnjë pikë të aktakuzës, raporton “Betimi për Drejtësi”.
Kryetarja e trupit gjykues, gjykatësja Valbona Musliu- Selimaj njoftoi palët se kanë të drejtë ankese në afat prej 30 ditësh për kundërshtim të provave dhe hudhje të aktakuzës.
Paraprakisht në këtë seancë mbrojtësi i të akuzuarit Arsic, avokati Vasilije Arsici propozoi gjykatës që të mbrojturit të tij të i ndërpret masën e paraburgimit dhe t’i shqiptojë një masë më të lehtë alternative pasi që është baba i tre fëmijëve të mitur dhe se i njëjti do të jetë i gatshëm që të paraqitet në çdo ftesë të gjykatës.
Një propozim i tillë u kundërshtua nga prokurori Dema për shkak se sipas tij i akuzuari Arsic ka dokumentacion të Republikës së Serbisë dhe se ekziston rreziku që i njëjti të largohet në Serbi dhe një gjë e tillë mund të rrezikonte procesin pasi që sipas tij mes shtetit tonë dhe Serbisë nuk ka bashkëpunim juridik.
Propozimi për ndryshim të masës së paraburgimit sipas prokurorit Dema duhej të mos aprovohej nga gjykata edhe për shkak të peshës së veprës penale.
Sipas avokatit Arsic, i akuzuari Arsic nuk do të linte Kosovën për shkak se i njëjti do të rrezikonte ekzistencën e familjes së tij për shkak se ai është mbajtës i familjes dhe se do të ishte çmenduri nëse i njëjti do të lëshonte Kosovën kur ishte në dijeni që nuk ishte fajtor.
Lidhur me këtë propozim gjykatësja Musliu- Selimaj morri aktvendim dhe tha se lidhur me të njëjtin propozim për ndërprerje së masës së paraburgimit apo zëvendësimin e saj me ndonjë nga masat tjera alternative do të vendos me vendim të veçantë duke vlerësuar të gjitha rrethanat.
