Gjenerali nga Shqipëria, Kudusi Lama, e ka vlerësuar si absurd vendimin e Dhomave të Specializuara në Hagë për dënimin e ish-krerëve të UÇK-së me 81 vite burgim
“Vendimi është absurd. Një Gjykatë moderne nuk mund të vendos për dënime të tilla. Ky vendim erdhi për faktin që të frikohen popujt e tjerë që mos ta ngrisin dorën për të luftuar e kërkuar liri”, ka thënë Kudisi Lama për “Infonata” në Tëvë1.
Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet.
Të katër u shpallën fajtorë për disa akuza për krime lufte, ndërsa u shpallën të pafajshëm për akuzat për krime kundër njerëzimit.
“Gjykata nuk arriti që ta kriminalizojë luftën e UÇK-së. Evropa bëri një dënim që të krijojë përçarje në mes të shqiptarëve. Ne nuk duhet që të ngrisim akuza ndaj njëri-tjetrit. Duhet t’i thërrasim mendjes dhe nuk duhet të biem në kurthin e kësaj Gjykate dhe të përçahemi”, theksoi Lama.
Kudusi Lama është ushtarak nga Shqipëria me gradën gjeneral, i cili ka qenë komandant i divizionit të Kukësit të Forcave të Armatosura të Republikës së Shqipërisë gjatë konfliktit në Kosovë dhe bombardimit të ish-Jugosllavisë nga NATO viteve 1998-99.
