Prokuroria Speciale e Kosovës ka ngritur aktakuzë ndaj serbit Z.A. me dyshimin e rrahjes, maltretimit dhe kërcënimit me jetë ndaj të dëmtuarit shqiptar, B.M. si dhe dëbimit të shqiptarëve nga Kamenica gjatë kohës së luftës në Kosovë, raporton teve1.info
Sipas komunikatës së Prokurorisë Speciale, Z.A. kishte marrë pjesë i uniformuar me uniformë të policisë serbe dhe i armatosur në keqtrajtimin e B.M. në qendër të qytetit të Kamenicës.
Kurse, akuzohet se në bashkëkryerje edhe me pjesëtarë tjerë të policisë serbe dhe grupe paramilitare kishte marrë pjesë edhe në dëbimin e shqiptarëve me dhunë nga Kamenica.
“Prokuroria Speciale njofton se ekziston dyshimi i bazuar mirë se i pandehuri Z.A, gjatë periudhës së luftës në Kosovë, në bashkëkryerje me pjesëtarë tjerë të policisë serbe, i uniformuar me uniformë të policisë serbe dhe i armatosur, e kishte ndaluar në qendër të qytetit të Kamenicës të dëmtuarin B.M. duke e torturuar në mënyrë ç‘njerëzore, maltretuar dhe duke i shkaktuar lëndime të rënda trupore, traumë dhe pasoja në shëndet, si dhe, duke e kanosur seriozisht për jetë për një orë e gjysmë, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë.
Po ashtu, i pandehuri Z.A. në bashkëkryerje me pjesëtarë tjerë të policisë serbe dhe grupeve paramilitare, ka marrë pjesë në dëbimin dhe shpërnguljen me dhunë të qytetarëve të Kamenicës me rrethinë, pastaj kanë filluar të bëjnë plaçkitjen e shtëpive, e më pas me qëllim të dëmtimit të pronës së shqiptarëve i’a kanë vënë zjarrin, po ashtu kanë marrë pjesë në keqtrajtimin e civilëve shqiptarë”, thuhet në komunikatën e Prokurorisë.
Me këto veprime i pandehuri Z.A. ka kryer veprën penale “Krime lufte kundër popullatës civile’’ nga neni 142 lidhur me nenin 22 të LP të RSFJ-së, thuhet në vendimin e Prokurorisë.