Ish-mesfushori i Kombwtares kuqezi, Burim Kukeli bën një tjetër hap të madh në rrugëtimin e tij si trajner. Pas një sezoni si trajner i Grasshopper U21, ish-mesfushori i Kombëtares shqiptare është promovuar në stafin teknik të skuadrës së parë e cila ka për trajner Bruno Berner të emëruar në fillimin e muajit qershor.
Lajmin e ka dhënë vetë klubi nga Zyrihu, që përveçse do të ketë Kukelin në pankinë, ka si kapiten në fushë një tjetër kuqezi, mesfushorin Amir Abrashi.
“Grasshopper Club Zurich ka kënaqësinë të promovojë Burim Kukelin nga U21 në ekipin e parë”, thuhet në deklaratën e klubit, që ndër të tjera sjell në vëmendje kohën kur Kukeli luante në Kampionatin Europian, në krah të Amir Abrashit.
E nëse Kukeli promovohet si pjesë e stafit të skuadrës së parë, vendin e tij te Grasshopper U21 e merr një tjetër shqiptar. Bëhet fjalë për Sero Nokën, i cili ka qenë ndihmës i Kukelit te Grasshopper U21 dhe tani do të jetë trajner i parë.