Derisa basketbollistët po vazhdojnë stërvitjet ndeshja është afruar, kurse FBK ka bërë të ditur sot se biletat për ndeshjen Kosova – Zvicra, dalin në shitje pasditen e sotme.
Kosova dhe Zvicra do të ndeshen në kuadër të parakualifikimeve për Eurobasket 2025, ndërsa për herë të parë timonier i Kosovës do të jetë Rami Hadar, që bëri Pejën kampione të Kosovës në stinorin e kaluar në Superligë.
Basketbollistët e Kosovës janë shprehur të jenë të gatshëm për përballjen, që do të zhvillohet më 19 korrik me fillim prej orës 20:45 në Sezai Surroi të Prizrenit. Gjithashtu, për Kosovën kjo do të jetë ndeshja e parë që luhet në Prizren si vendas. Deri tash kombëtarja dardane ka luajtur në Prishtinë e Mitrovicë si vendas.
Sipas njoftimit, në Prizren biletat do të shiten në Shadërvan prej orës 17:30 deri në orën 21:30 në Shadërvan. Kurse në Prishtinë te amfiteatri i sheshit Zahir Pajaziti. Çmimi i biletës është 3 euro. Ndërsa FBK ka shkruar në njoftim se Kosovës i duhet përkarhja nga tribunat, për të nisur mbarë ciklin parakualifikues.
