Këshilli për Mbrojtjen e të Drejtave dhe Lirive të Njeriut ka reaguar për përleshjen që ka ndodhur më 13 korrik në seancën e rregullt të Kuvendit të Kosovës.
KMDLNj, thotë se udhëheqja e seancës nga kryetari i Kuvendit, Glauk Konjufca, ishte në kundërshtim me Rregulloren e Punës së Kuvendit.
KMDLNj thotë se kryeministri, presidentja, ministrat, zëvendësministrat “konsiderohen mysafirë dhe duhet t’i nënshtrohen rregullave që janë të përcaktuara nga Kuvendi e që nuk ndodhi në seancën e fundit”.
Sipas këtij këshilli, zëvendëskryeministri Besnik Bislimi, nuk ka pasur të drejtë ta grisë foton e vendosur nga opozita, ku paraqitej kryeministri Albin Kurti me hundë të gjatë, si dhe shkelje tjetër sipas këshillit është kur i njëjti e gjuan me shishe uji deputetin e PDK-së, Mërgim Lushtakun.
“Në këtë situatë, kryetari i Kuvendit, po të kishte pasur profesionalizëm dhe guxim, do ta largonte nga seanca Besnik Bislimin sepse, si mysafir, në kundërshtim me Rregulloren e Kuvendit ndërmori veprime që nuk i takojnë sikur që sulmoi deputetin Lushtaku”, tha KMDLNj.
Këshilli thotë se është i sigurt se nëse kryetari i Kuvendit do ta largonte nga seanca Bislimin, situata do të qetësohej dhe seanca do të zhvillohej në rrethana krejtësisht tjera.
Ndërkaq, KMDLNj-ja, si shkeljen më të rëndë që e bëri kryetari i Kuvendit, e konsideron thirrjen drejtuar Policisë së Kosovës të intervenojnë sa ishte duke u zhvilluar seanca.
Në reagim thuhet se kryetari i Kuvendit fillimisht është dashur ta ndërpresë seancën e pastaj ta thërrasë Policinë e Kosovës që të ndërhyjë në qetësimin e seancës.
KMDLNj vlerëson se nuk ka asnjë bazë ligjore që të ndiqen penalisht asnjëri që shkaktoi incidente në këtë seancë, as nga ana e qeverisë e as nga ana e deputetëve./teve1.info/
