Ky është mjeti që tash e shumë muaj po ia mundëson lëvizjet sado të vogla 28-vjeçares nga Podujeva.
Ajo mbeti e lënduar rëndë në një vetëaksident me 29 gusht të vitit të kaluar.
Përveç abortimit të foshnjës, për katër muaj të plotë qëndroi në komë, derisa pjesën tjetër të kohës me vetëdije, por pa mundur që të lëvizë.
Derisa mjekët vendor ia kishin shuar shpresat familjarëve për shërimin e plotë të saj, shpresat për shërim asaj i erdhën nga Turqia.
Por, për shërimin e Rina Latifit, kërkohen minimalisht 67 mijë euro.
Babai Tafil Latifi, flet me emocione derisa kërkon ndihmë nga njerëzit e vullnetit të mirë për shërimin e vajzës së tij.
Në rast të mostrajtimit të shpejtë, mjekët tërheqin vërejtjen se shërimi i Rinës mund të rrezikohet.
Kjo për shkak të dobësimit të kockave nga qëndrimi i gjatë pa lëvizur.
Madje babai i Rinës tregon një rast ku një i ri kosovar i cili për tetë vjet kishte qenë i palëvizshëm dhe pas trajtimit në të njëjtin spital, tani mund të ec deri në katër orë në ditë.
Familja Latifi thotë se nuk aplikoi në Ministri të Shëndetësisë për sigurimin e parave të nevojshme, për shkak të procedurave të zgjatura, ndërkohë që shërimi i saj duhet të bëhet urgjent.
