Iljasa Zulfiu ka shënuar gol në minutat shtesë për tjetër festë në “Fadil Vokrri”. Zulfiu të enjten mbrëma shënoi gol në minutën e 96-të për fitoren e Dukagjinit ndaj Europas së Gjibraltarit.
Ndaj Europas, Dukagjini i Klinës e luajti ndeshjen debutuese në kupat evropiane. Fitoi me rezultatin 2:1 në ndeshjen e parë të raundit të parë kualifikues të Ligës së Konferencës.
Në minutën e 96-të Zulfiu gjuajti bukur nga zona, ndërsa topi i devijuar nga një mbrojtës përfundoi në rrjetë.
Dukagjini kaloi në epërsi 1:0 në minutën e 30-të. Gol të bukur me goditje nga distanca shënoi Bujar Shabani. Por ekipi gjibraltaras barazoi rezultatin në fund të pjesës së parë, përkatësisht në minutën e gjashtë shtesë. Jesus Pozo shënoi me goditje të bukur me kokë për 1:1.
Ndeshja e kthimit luhet më 20 korrik në Gjibraltar. Dukagjinin e pret punë e vështirë për avancim tutje, por hapin e madh e bëri të enjten në “Fadil Vokrri” në Prishtinë.
