Dy ditë me parë Ballkani kryejti punë mirë në “Fadil Vokrri”. Ekipi suharekas fitoi 2:0 ndaj Ludogorets në ndeshjen e parë të raundit të parë kualifikues në Champions. Mirëpo ëndërra evropiane për dy skuadra tjera të Superligës nis sot (e enjte).
Finalisti i Kupës së Kosovës, Gjilani këtë të enjte si mysafire fillon garën në Conference League. Kuqebardhët do të ballafaqohen me Niederkonin e Luksemburgut.
Te Gjilani pavarësisht se kanë pak njohur për kundërshtarin e tyre, atmosfera brenda kampit kuqebardhë është me optimizëm, pasi synojnë të kalojnë këtë pengesë.
Gjilani dhe Progres Niederkoni luajnë nga ora 19:30 në stadiumin “Stade Jos Haupert”. Për Gjilanin kjo është hera e tretë që paraqitet në garat e UEFA-s.
Do të jetë edhe debutimi i Klodian Duros në krye të Gjilanit, me trajnerin shqiptar që kërkon të fillojë suksesshëm aventurën e tij.
Derisa në Evropë, do të debutojë Dukagjini i Klinës. Dukagjini sonte debuton në garat evropiane, përkatësisht në raundin e parë kualifikues të Ligës së Konferencës.
Nga ora 19:00 e pret në “Fadil Vokrri” skuadrën nga Gjibraltari, Europën.
Dukagjini siguroi Evropën nga pozita e katërt në Superligë, pasi fituesja e Kupës, Prishtina, nuk u licencua nga FFK-ja për garat e UEFA-s.
Përballja me skuadrën nga Gjibraltari është vlerësuar si “fat në short” për Dukagjinin. Dhe për këtë në kampin klinas nuk u mungon dëshira për fitore, përkatësisht për debutim të suksesshëm në kupat evropiane.
