Shtetet e Bashkuara të Amerikës e kanë futur në listën e sanksioneve drejtorin e Agjencisë për Siguri dhe Informacion të Serbisë (BIA), Aleksandar Vulin.
Ky vendim sipas njohësi të sigurisë, Nuredin Ibishi do ta fusë presidentin e Serbisë, Aleksandar Vuçiq në presion, pasi në njërën anë do të përballet me kërkesën e shteteve perëndimore për shkarkimin e Vulinit, në anën tjetër Rusia do të bëjë presion që të mos ndodhë një shkarkim i tillë, pasi Vulini është i afërt me shtetin rus.
“Presidentin e Serbisë, Vuçiqin e ka vënë në siklet se çfarë do të bëjë. Pritet që ta shkarkojë, megjithëse e ka dorë të djathtë atë. Vulin e ka si dorë të djathtë në raport me Rusinë. Do të thotë është në presion nga Putini e Lavrovi që atë mos ta shkërkojë, por edhe presioni i madh i Shtetet e Bashkuara të Amerikës dhe vendet e e Bashkimit Evropian e Mbretëria e Bashkuara që do të kërkojnë që ky lider famëkeq të largohet nga ky post i ndjeshëm i sigurisë në Serbi”, vlerësoi Ibishi në emisionin InfoNata në Tëvë1.
Siç është bërë e ditur të martën nga Departamenti i Thesarit të Shteteve të Bashkuara, sanksionet janë vendosur pasi Vulini është përshirë në afera korruptive. Ndërkohë, Ibishi ka thënë se Vulin dyshohet edhe për përfshirje me trafikim narkotikësh, si dhe në veprimtari që kërcënojnë sigurinë e rajonit, e bashkëpunim me shërbimet e inteligjencës rusë.
