Deputeti i Partisë Demokratike të Kosovës, Rashit Qalaj tha shefja e Grupit Parlamentar të Lëvizjes Vetëvendosje, Mimoza Kusari-Lila nuk ka bërë ndonjë shkelje që ka biseduar me Slavko Simiqin e Listës Serbe.
Ai tha se po të përfundonte gjithçka me këtë një bisedë mes dy kolegësh nuk do të ishte problem.
“Po të ishte vetëm diskutimi i zonjës Kusari me ish-deputetin e Parlamentit të Kosovës, i cili ka qenë edhe kryetar i Grupit Parlamentar të Listës Serbe nuk do të ishte kjo temë. Flasin dy kolegë, dy deputetë në parlament dhe krejt ok. Edhe çështja nëse zonja Kusari i ka kërkuar mbështetje Listës Serbe për disa ligje, siç është për shembull Ligji për festat zyrtare, Ligji për fenë apo ndonjë ligj tjetër, nuk është problem”, u shpreh Qalaj në emisionin InfoNata në Tëvë1.
Por, sipas ish-drejtorit të Policisë, problem është komunikimi i deputetes Kusari-Lila me Milan Radojçiqin.
“Problemi është që zonja Kusari, në bazë të këtyre incizimeve ka komunikuar me një njeri i cili është në kërkim nga institucionet e Kosovës, nga prokuroria e këtij vendi, për shumë krime dhe që është në Listën e Zezë të Shteteve të Bashkuara të Amerikës. Ky është thelbi i problemit’, shtoi Qalaj.
