Ishte njëri nga ithtarët më të mëdhenj të nismës rajonale “Ballkani i Hapur”.
Por kryeministri i Shqipërisë, Edi Rama, i befasoi të gjithë kur në mënyrë unilaterale vendosi të heqë dorë nga ky projekt rajonal.
Sipas Ramës “Ballkani i Hapur” kreu misionin për të cilin u krijua.
Por i befasuar me qasjen e Ramës u shpreh Presidenti i Serbisë, Aleksandar Vuciq, i cili tha që shpreson ta takojë sa më shpejtë kryeministrin shqiptar, për të folur lidhur me vendimin e tij për ta braktisur “Ballkanin e Hapur”.
Duke i komentuar këto zhvillime, profesori nga Johns Hopkins University, Daniel Serwer, thotë se që nga fillimi ky projekt ishte i panevojshëm.
Sipas tij, mosarritja deri te normalizimi i marrëdhënieve mes Kosovës dhe Serbisë, ka ndikuar që kjo nismë të mos funksionoj ashtu siç ishte planifikuar nga kreatorët e tij.
“Ballkani i Hapur ishte i tepërt dhe i panevojshëm. Disa prej shteteve të Ballkanit nuk iu bashkuan kësaj nisme, prandaj edhe nuk ka pasur sukses. Natyrisht që edhe mungesa e normalizimit të marrëdhënieve mes Kosovës dhe Serbisë ka ndikuar që të mos funksionojë kjo nismë rajonale. Unë mendoj se çdo gjë të mund të bëhet më mirë në kuadër të Procesit të Berlinit”, tha Server.
Megjithatë, analisti politik nga Tirana, Ben Andoni, thotë se Rama ka përfituar politikisht nga ky proces.
Në anën tjetër profesori Seb Bytyçi, thotë se Tirana e ka kuptuar më në fund se nuk e ka mbështetjen e vendeve perëndimore për këtë nismë.
Kujtojmë që përveç Kosovës, edhe Mali i Zi dhe Bosnja Herzegovina refuzuan të bëhen pjesë e Open Balkan, përderisa nisma ishte promovuar fuqishëm nga tri shtetet e tjera ballkanike, Serbia, Shqipëria dhe Maqedonia e Veriut.
