Komisioni Qeveritar për Persona të Zhdukur, ka njoftuar se ekipet e tyre po vazhdojnë gërmimet për zbardhjen e fatit të personave të zhdukur, e kësaj here në Kishnicë dhe në Arbëri (Dragodan).
Përmes një postimi në Facebook, kanë shkruar se zbardhja e fatit të të pagjeturve mbetet njëra nga çështjet më të ndjeshme në Kosovë, përcjell teve1.info.
“Ekipet tona po vazhdojnë punën e tyre në teren. Krahas gërmimeve në lokacionet tjera, si Podujevë dhe Kamenicë, këtë javë ekipet po vazhdojnë gërmimet edhe ne Kishnicë dhe në Arbëri (Dragodan) të Prishtinës. Zbardhja e fatit të personave të zhdukur mbetet një nga çështjet më të ndjeshme në vendin tonë, dhe njëkohësisht një tregues i qartë i mohimit të vazhdueshëm të krimeve nga ana e Serbisë”, thuhet në postimin e tyre.
Kujtojmë që sipas të dhënave zyrtare, 1.617 persona konsiderohen të zhdukur me forcë që nga lufta e fundit në Kosovë.
