Prokuroria Speciale e Kosovës ka paraqitur kërkesë pranë Gjykatës Themelore të Prishtinës për caktimin e masës së paraburgimit për serbin D.M, të arrestuar dje në Graqanicë nën dyshimet për kryerjen e krimeve të luftës në Kosovë.
Lajmin e ka konfirmuar për teve1.info Liridonë Kozmaqi-Hajdaraj, udhëheqëse e Zyrës për Komunikim Publik në Zyrën e Kryeprokurorit të Shtetit.
“Ju informoj se prokurori nga Prokuroria Speciale e Republikës së Kosovës, ka paraqitur kërkesë për caktim të paraburgimit për të dyshuarin që keni pyetur. Për më shumë info rreth seancës mund t’i drejtoheni Gjykatës Themelore në Prishtinë”, ka thënë ajo.
Ndryshe Policia e Kosovës ka arrestuar personin e nacionalitetit serb me inicialet D.M, nën dyshimet për krime lufte.
I njëjti dyshohet që në cilësinë e gardianit të burgut, së bashku me gardianë të tjerë, kanë kryer krime në burgun e Prishtinës dhe Lipjanit, gjatë kohës së luftës.
“Ndaj të njëjtit janë siguruar prova për ekzistimin e dyshimit të arsyeshëm se në bashkëkryerje edhe me pjesëtarë të tjerë, gjatë periudhës së luftës në Kosovë në cilësi të personave zyrtar (gardian të burgut) në Prishtinë dhe në paralelen e ndarë nga Prishtina konkretisht në burgun e Lipjanit, në mënyrë sistematike, dyshohet se kanë ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë”, thuhet në njoftimin e policisë.
Të njëjtit i është bastisur edhe shtëpia dhe i janë sekuestruar armë e dokumente, transmeton teve1.info.
“- një armë zjarri-revole e tipit “Zastava” cal.9mm,
– 136 fishek të kalibrit 9x19mm,
– thikë ushtarake e tipit SOG Speciality Knives,
– shufër metalike “Taiwan”,
– dokumente, vendime, notes dhe telefon personal, etj”, janë materialet e sekuestruara.