Në pikën kufitare në Merdarë janë ndaluar të gjithë kamionët të cilët posedojnë mallra serbe për të hyrë në territorin e Kosovës.
Gazetari, Arton Rama, i cili aktualisht gjendet në këtë pikë kufitare, po ashtu bëri të ditur se deri më tani janë ndaluar mbi 20 kamionë, shkruan teve1.info.
“Ne gjendemi në pikën kufitare në Merdarë. Tashmë kemi marrë konfirmim jozyrtar që janë ndalur të gjithë kamionët të cilët posedojnë mallra serbe për të hyrë në Kosovë. Në komunikim që kishim me zyrtarët policorë të cilët gjenden këtu në pikën kufitare në Merdarë, po ashtu me doganierët, ata kanë thënë që kanë marrë këtë vendim. Mirëpo, vendim tjetër i lëshuar nga Qeveria e Kosovës, e që nuk është konfirmuar ende një gjë e tillë, është që kamionët me targa serbe që posedojnë mallra të ndonjë shteti tjetër, as ata të mos lejohen të hyjnë në Kosovë. Diku janë mbi 20 kamionë të cilët kanë mbetur në radhë tek pala serbe këtu në pikën kufitare në Merdarë, të cilëve u është ndaluar hyrja për në territorin e Kosovës”, deklaroi Rama në një lidhje direkte në Tëvë1.
Njëherit, Rama tha se një konfirmim zyrtar nuk ka arritur ta marrë ende nga Dogana dhe Qeveria e Kosovës.
Derisa, Qeveria e Kosovës nuk ka lëshuar ende një njoftim zyrtar lidhur me këtë vendim.
Kujtojmë se ky vendim u mor pas kidnapimit të tre zyrtarëve policorë nga forcat speciale serbe në Leposaviq./teve1.info/.
