Kryeministri i Kosovës, Albin Kurti ka pranuar një letër urimi nga kryeministri i Hungarisë, Péter Magyar, me rastin e mandatit të ri qeverisës.
Sipas njoftimit të Qeverisë së Kosovës, letra i është dorëzuar Kurtit të premten pasdite, përmes ambasadorit hungarez në Kosovë, László István Dux.
Në letrën e tij, Magyar ka vlerësuar rolin e Kosovës në ruajtjen e stabilitetit në Ballkanin Perëndimor, duke theksuar rëndësinë e një rajoni të qëndrueshëm dhe prosperues për Hungarinë dhe Evropën.
“Ne njohim rolin kyç të Kosovës në stabilitetin e rajonit të Ballkanit Perëndimor. Andaj, jemi të bindur që një Ballkan Perëndimor prosperues ka rëndësi jetike për Hungarinë dhe mbarë kontinentin evropian”, thuhet në letrën e kryeministrit hungarez.
Magyar ka rikonfirmuar gjithashtu përkushtimin e Hungarisë për sigurinë e Kosovës, përmes pjesëmarrjes në misionin e KFOR-it, si dhe mbështetjen për integrimin evropian të vendit.
“Në këtë frymë, më lejoni të ritheksoj se Hungaria mbetet e përkushtuar për të kontribuuar për sigurinë e Kosovës nëpërmjet pjesëmarrjes në misionin e KFOR-it dhe për të mbështetur vendin tuaj në rrugën evropiane”, ka shkruar Magyar./teve1.info/
