Ministri i Shëndetësisë, Arben Vitia ka thënë se kompania Pharma Leader dyshohet se ka kryer veprën penale të falsifikimit të dokumentacionit në tender.
Sipas Vitisë kjo kompani del se nuk pasur asnjë marrëveshje apo leje për të importuar insulina në Kosovë.
“Shprehim shqetësimin tonë të thellë lidhur me dyshimet për veprën penale ‘Falsifikimi i dokumentacionit në tender’ nga ana e operatorit ekonomik Pharma Leader. Dje më datën 12 qershor jemi njoftuar zyrtarisht se në fakt asnjëherë kompania Pharma Leader, nuk ka pasur asnjë marrëveshje apo leje për të importuar insulina në Kosovë – as nga prodhuesi amerikan Eli Lilly, as nga kompania në Maqedoni të cilën pretendon”, ka thënë Vitia në një konferencë urgjente për shtyp, transmeton teve1.info.
Vitia tha se kjo kompani e ka ofruar një dëshmi që zotëron leje për të importuar insulina në Kosovë, por që kishte dalë të ishte dëshmi e rreme.
“Në dokumentin e majit 2023, operatori ekonomik e ka ofruar një dëshmi, statement, nga Pharma Trade në gjuhen angleze. Me qëllim të konfirmimit të rregullsisë së dëshmisë, Ministria e Shëndetësisë ka kontaktuar përmes shkresave elektronike me kompaninë Pharma Trade me seli në Maqedoni të Veriut. Nga ta kemi pranuar përgjigje se dëshmia e ofruar nga Pharma Leader nuk është valide dhe se ata asnjëherë nuk kanë ofruar një dëshmi të tillë. Në pyetjen tonë se prodhuesei Eli Lilly është në dijeni për përmbajtjen e kësaj shkrese/dëshmie të ofruar nga Pharma Leader, dëshmia është se as prodhuesi nuk është në dijeni të ekzistimit të një shkrese të tillë që kompania e ka prezantuar si dëshmi në Ministrinë e Shëndetësisë”, ka thënë Vitia.
“Bazuar në këtë korrespodencë të verifikimit të dëshmive, Pharma Leader dyshohet se ka ofruar dokument të falsifikuar, gjë që konsiderohet vepër penale”, tha Vitia.