“Fillimisht, martesa e hershme përveç që e fuqizon më tutje idenë e pabarazisë gjinore, në të cilën padyshim që në aktin e martesës, të rinjtë, kryesisht vajzat, nuk pyeten, pasi që djali mund të jetë në moshë më të rritur. Kjo e vë më tutje në pah thyerjen e autonomisë së saj, që do të thotë se në këto rrethana kur vajza kalon tek familja tjetër, ne shohim që pragu i autonomisë është shumë i kufizuar”, ka thënë Sadiku.
Ai ka shtuar se ato angazhohen në procesin e punëve fizike, angazhohen në aplikimet e të gjitha kushteve ose veprimtarive që familja paraprakisht ka kryer dhe si rrjedhojë e gjen veten në një mes pa autonomi të plotë, pa rol në vendimmarrje, pa mundësi për t’u edukuar më tutje dhe sigurisht duke u ballafaquar me rrethanat të cilat mund ta impaktojnë edhe shëndetin fizik të saj.
“Studimet në aspektin psikologjik tregojnë që ka një korrelacion më të lartë në disa çrregullime psikologjike dhe psikiatrike tek personat, veçanërisht tek vajzat që martohen herët. Po flasim në martesat mes të miturve, çrregullimet bipolare janë pjesë e tyre, të cilat më së shpeshti vërehen duke u përcjellë nga çrregullime të depresionit dhe forma të tjera të çrregullimeve sematoforme, që do të thotë edhe në aspektin e shëndetit mendor ne jemi rrënjësisht të impaktuar nga martesat e hershme”, thotë Sadiku.
Për më shumë ndiqeni emisioni “De Jure”, në Tëvë1 dhe “Betimi për Drejtësi”, për hulumtimin mbi “Martesat mes të miturve”/Tëvë1/
