NATO ka reaguar pasi që rreth 25 ushtarë të misionit të saj të KFOR-it, u lënduan gjatë përleshjeve me protestuesit në komunat veriore gjatë së hënës.
Kjo organizatë ka bërë thirrje që dhuna të ndalet menjëherë, përderisa ka ftuar palët të përmbahen nga veprimet që nxisin më tej tensionet.
“NATO dënon fuqishëm sulmet e paprovokuara kundër trupave të KFOR-it në veri të Kosovës, të cilat kanë çuar në plagosjen e një numri prej tyre. Sulme të tilla janë krejtësisht të papranueshme. Dhuna duhet të ndalet menjëherë. Ne u bëjmë thirrje të gjitha palëve që të përmbahen nga veprimet që nxisin më tej tensionet dhe të angazhohen në dialog. KFOR-i do të ndërmarrë të gjitha veprimet e nevojshme për të ruajtur një mjedis të sigurt dhe të qetë dhe do të vazhdojë të veprojë në mënyrë të paanshme, në përputhje me mandatin e tij sipas Rezolutës 1244 të Këshillit të Sigurimit të Kombeve të Bashkuara të vitit 1999”, thuhet në komunikatë.