Kryeministri i Kosovës, Albin Kurti ka thënë se Kosova dhe Mali i Zi si dy shtete fqinje ndajë aspirata të njëjta për integrim në strukturat trans-atlantike.
Ai në festën me rastin e ditës së Pavarësisë së Malit të Zi, tha se shpallja e pavarësisë ishte realizim i aspiratës së popullit të saj.
Në këtë vendim përmendi edhe rolin e shqiptarëve në Mal të Zi.
“Pragu i lartë në referendumin e pavarësisë para 17 vjetëve, nuk mund të kalohej pa mbështetjen e shqiptarëve në Malin e Zi, të cilët në mënyrë masive e mbështetën pavarësinë, kontribut ky i cili vlerësohet e duhet vlerësuar”, tha Kurti në fjalimin e tij.
Ai duke folur për bashkëpunimin ndërmjet dy shteteve tha se raportet janë shumë të mira dhe se së bashku po punojnë për t’i kontribuar paqes.
“Mali i Zi e njohu pavarësinë e Kosovës që në vitin e shpalljes në 2008. Sot, si dy shtete fqinje punojmë së bashku për të promovuar paqen, sigurinë dhe prosperitetin në rajonin tonë. Jemi mirënjohës që në kohërat më të vështira, Mali i Zi u bë strehë shpëtimi për mbi 100 mijë qytetarë të Kosovës dhe nuk harrojmë asnjëherë mikpritjen dhe solidaritetin. Kemi punuar për të nxitur tregtinë dhe investimet, lëvizjen mes njerëzve dhe mallrave dhe përpara kemi projekte infrastrukturore të cilat do të lidhin e fuqizojnë edhe më tej dy shtetet tona”, tha Kurti.
