Nënkryetari i LDK-së, Lutfi Haziri aludon se kryeministri Kurti nuk po i jep përgjigje shumë pyetjeve.
Haziri thotë se Kurti nuk po tregon se kur do të betohen 3 nga 4 kryetarët e rinj të komunave veriore e as kur do të kthehen zyrtarët bojkotues të institucioneve në veri.
“Kurti nuk tregon kur betohen kryetarët e rinj të komunave veriore, kur kthehen zyrtarët bojkotues të institucioneve në veri, kur zbaton draftimin e Asociacionit për vetëmenaxhimin e komunave më shumicë serbe e kur zbaton vendimin me kërkesen e tij për hapjen e urës per veriun e Mitrovicës”, ka shkruar Haziri.
Sipas Hazirit, Kurti nuk po e tregon as “planin për kthimin e refugjatëve në atdheun e tyre për Mitrovicë dhe komunat në veri, nuk tregon kur ia kthen buxhetin vetanak komunave, nuk tregon kur përfundon autostrada për Gjilan, Mitrovicë e Pejë, si dhe 780 milionë euro të investimeve kapitale kur përfundojnë”.
“Veç Kurti e di se cili prokuror, gjykatës, polic, mjek, anëtar bordi, kryeshef agjencie e drejtues tjerë institucionalë i pelqen atij, kryekuvendarit dhe Presidentes”, ka shkruar Haziri.
“Për të tjerët s’ka gajle. Populli thotë: Qeveria në qiell e populli në buqillë!”, thuhet tutje në postimin e ish-kryetarit të komunës së Gjilanit.
