Presidentja Vjosa Osmani ka folur në ceremoninë hapëse të ushtrimit më të madh fushor ndërkombëtar në rajonin e Ballkanit, “Defender Europe”, ku Kosova këtë vit është nikoqire.
Osmani e ka quajtur këtë ushtrim si simbol të vendosmërisë kolektive të Kosovës për ta ruajtur paqen e stabilitetin
“Ky ushtrim ndërkombëtar është një simbol i vendosmërisë sonë kolektive për ta ruajtur paqen dhe stabilitetin në një botë që po sfidohet vazhdimisht. Është një kujtesë që forca jonë nuk qëndron vetëm në fuqinë e armëve tona, por në lidhjet që ne krijojmë, në aleancat që ne ndërtojmë dhe në vlerat e përbashkëta të cilat çdo ditë po i kultivojmë”.
Presidentja ka thënë se uniteti dhe bashkëpunimi mes Kosovës dhe vendeve mike është çelës për një të ardhme më të sigurt e më paqësore.
“Së bashku ne jemi më të fortë kundrejt forcave që kërkojnë të na ndajnë, duke dëshmuar se uniteti dhe bashkëpunimi ynë janë çelës për një të ardhme më të sigurt e më paqësore. Objektivi kryesor i Defender 2023 është që ta shfaqë aftësinë ushtarake dhe luftarake të ShBA-së dhe forcave aleate, kundër agresorëve të mundshëm dhe për t’i siguruar aleatët dhe partnerët evropianë se kontinenti është i sigurtë nga sulmet e mundshme. Ky ushtrim është historik në shumë aspekte, veçanërisht për ushtrinë më të re në kontinentin evropian, për Forcën tonë të Sigurisë”, ka deklaruar ajo, përcjell teve1.info.
Tutje ajo ka deklaruar se FSK në këtë ushtrim do të demonstrojë se është e gatshme për të realizuar detyrat në kuadër të operacioneve shumëkombëshe të paqes.
“Tani në këtë stërvitje do të demonstrojmë praktikisht se ata janë të gatshëm për të realizuar detyrat në kuadër të operacioneve shumëkombëshe të paqes dhe stabilitetit kudo që ka nevojë. Pjesëmarrja e Kosovës në stërvitje, me gatishmërinë dhe ndërveprueshmërinë e rreth 1400 trupave të FSK-së, përkrah edhe shumë trupave amerikane dhe trupave të tjera shumëkombëshe të vendeve aleate dhe partnere, e shteteve të tjera të NATO-s, konfirmon edhe besimin e ShBA-së ndaj Kosovës dhe ushtrisë sonë. Ne jemi të vendosur fuqishëm në konsolidimin e institucioneve të sigurisë”.