Ka nisur ceremonia hapëse e ushtrimit “Defender Europe ‘23” e organizuar nga NATO, ku pjesëmarrëse do të jetë Forca e Sigurisë së Kosovës.
Të pranishëm në këtë ceremoni pritet të jenë krerët e shtetit, presidentja e Kosovës, Vjosa Osmani, kryeministri Albin Kurti, ministri i Mbrojtjes, Armend Mehaj dhe komandanti i FSK-së, Bashkim Jashari.
Ky ushtrim udhëhiqet nga ushtria amerikane dhe synim ka rritjen e bashkëpunimit në mes të partnerëve si dhe gatishmërinë operacionale të NATO-s dhe partnerëve për të reaguar në rast kërcënimi ndaj Evropës.
Derisa, presidentja e Kosovës, Vjosa Osmani, javë më parë ka shprehur mbështetjen e plotë për zhvillimin dhe avancimin e FSK-së, si dhe mbarëvajtjen e Stërvitjes.
Ndërkohë, koloneli i Forcës së Sigurisë së Kosovës, Ejup Maqedonci, ditë më parë ka thënë se mbi 1300 trupa të kësaj force do të marrin pjesë në ushtrimin “Defender Europa ‘23”.
Maqedonci në emisionin “Ditari” në Teve1 ka thënë se ky është ushtrimi më i madh i mbajtur ndonjëherë, sidomos sa i përket përfshirjes së Kosovës. /teve1.info/
