Sindikata e Policisë së Kosovës është pranuar në Këshillin Evropian të Sindikatave Policore.
Madje pro pranimit kanë votuar edhe sindikatat policore nga vendet mosnjohëse të pavarësisë së Kosovës.
“Të gjithë përfaqësuesit e shteteve anëtare të Evropës si dhe shtetet që ende nuk e kanë njohur Republikën e Kosovës si Spanja, Greqia dhe Qipro votuan unanimisht për pranimin e Sindikatës së Policisë së Kosovës si anëtare me të drejta të barabarta në CESP”, thuhet në njoftimin e sindikatës.
Sindikata e Policisë së Kosovës e ka quajtur pranimin në këtë organizatë “një arritje të madhe për Policinë e Kosovës për garantimin e të drejtave social-ekonomike dhe ligjore”.