Ambasadorja e Serbisë në Këshillin e Evropës , Aleksandra Gjuroviq, tha në samitin në Rejkjavik se Serbia është vënë në një situatë për të shqyrtuar kuptimin dhe modalitetet e mëtejshme të anëtarësimit të saj në atë organizatë, pas vendimit për fillimin e procedurës së pranimit të Kosovës në anëtarësim.
Në samitin e krerëve të shteteve dhe qeverive të Këshillit të Evropës, i cili u bojkotua nga zyrtarët më të lartë të Serbisë, Gjuroviq tha se “me vendimin e fundit të Komitetit të Ministrave të Këshillit të Evropës për të filluar procedurën për pranimin e të ashtuquajturës Kosovë, një sërë vendesh sakrifikuan unitetin dhe neglizhuan parimet themelore të Këshillit të Evropës për të arritur interesat dhe qëllimet e tyre politike”.
“Ai akt, i cili kërcënon drejtpërdrejt interesat jetike të Serbisë në Këshillin e Evropës, shtron pyetjen legjitime se cila është e ardhmja e Serbisë në organizatë dhe çfarë dëmi mund të presë në të ardhmen”, tha Gjuroviq, transmeton Danas.
Ajo tha se Serbia vendosi të abstenojë gjatë miratimit të deklaratës “Të bashkuar rreth vlerave tona” në samit për shkak të “mosgatishmërisë së shumicës së anëtarëve për të mbrojtur paprekshmërinë e kufijve të të gjithë anëtarëve të KE” në atë dokument, i cili ishte edhe arsyeja pse zyrtarët më të lartë të Serbisë e bojkotuan samitin.
Presidenti i Serbisë, Aleksandar Vuçiq, javën e kaluar njoftoi se Serbia do të përfaqësohet në nivelin më të ulët në samitin në Rejkjavik për shkak të mospranimit të propozimit të Beogradit për të futur pjesën “dhe të gjithë anëtarët e tjerë të Bashkimit Evropian” në deklaratë, e cila përmend integritetin territorial të Ukrainës, Gjeorgjisë dhe Moldavisë.
Gjuroviq deklaroi se Serbia “distancohet nga standardet e dyfishta në lidhje me respektimin e ligjit ndërkombëtar dhe parimin e paprekshmërisë së kufijve” dhe shtoi se Serbia respekton integritetin territorial të Ukrainës, Gjeorgjisë dhe Moldavisë, brenda kufijve të tyre të njohur ndërkombëtarisht.
“Në të njëjtën kohë, Serbia ka obligim të respektojë dhe mbrojë integritetin e saj territorial, prandaj nuk do të heqë dorë nga asnjë pjesë e territorit të saj. I takon anëtarëve të vendosin nëse do të interpretojnë në mënyrë selektive vlerat themelore në të ardhmen apo ne do të kuptojmë se precedentët dhe devijimet nga respektimi i parimeve çojnë në një zhvillim të pakontrolluar të ngjarjeve në botë”, shtoi Gjuroviq, përcjell teve1.info.
Në fillim të fjalimit, Gjuroviq tha se Serbia u bën thirrje të gjithë atyre që mund të ndikojnë në rrjedhën e luftës “brutale dhe të panevojshme” në Ukrainë, ta përdorin atë për t’i dhënë fund konfliktit sa më shpejt të jetë e mundur.
