Kompania “Sallahu” i ka reaguar deputetes Jeta Statovci, në lidhje me tenderin që kjo kompani e ka fituar për ndërtimin e rrugës A në kryeqytet.
Statovci tha dje në Komisionin për Buxhet, Punë dhe Transfere se pronari i kësaj kompanie është dënuar për mashtrim dhe se kjo kompani e ka të ndaluar të marrë pjesë në prokurime publike.
“Tenderi prej 8.5 milionë eurosh i Komunës së Prishtinës, iu dha firmës, ku pronari i saj ishte dënuar për mashtrim dhe falsifikim të dokumentit zyrtar, dhe nga Apeli e ka të ndaluar që të marrë pjesë në prokurime publike për një periudhë 10-vjeçare – deri më 2028. Në Komisionin për Buxhet, Punë dhe Transfere shpreha shqetësimin rreth zhvillimeve të fundit në OSHP lidhur me tenderin 8.5 milionësh, tender ky për rregullimin e rrugës A në Kryeqytet, rast i cili tashmë ka aktivizuar edhe Prokurorinë e shtetit. Shqetësimet implikojnë dhe OSHP-në në trajtimin e kesaj lënde”, tha Statovci.
Sipas kompanisë, Statovci e ka konstatuar dënimin e pronarit të kompanisë dhe ndalesën e kompanisë për të marrë pjesë në procedura tenderuese pa asnjë provë.
“Praktikat e tilla ku zyrtarët me përgjegjësi shtetërore deklarohen dhe akuzojnë pa asnjë prove bizneset, krijojnë pasiguri juridike dhe krijojnë një ambient të pa përshtatshme për të bërë biznes, njëherë ndikon edhe në investime nga investitorë serioz”, thuhet në reagimin e kompanisë.
Tutje “Sallahu” theksojnë se “tendencat e zyrtarëve shtetërorë , për të ndikuar në institucionet e drejtesise dhe ne institucionet e pavarura , ndikon në ushtrimin e funksionit të tyre në mënyrë të drejtë dhe te pavarur dhe cenon demokracinë ne vend“.
