Volejbollistet e Skenderajt nuk e kanë shfrytëzuar mundësinë e parë për ta rikthyer titullin e kampionit të Kosovës. Titulli iu mohua Skenderajt nga kampionia në fuqi, Drita, që triumfoi në ndeshjen e tretë të serisë finale të plejofit. Në duelin dramatik që ofroi një spektakël të vërtetë volejbolli, të luajtur të mërkurën mbrëma në Gjilan, Drita triumfoi me rezultatin 3:2 (25:21, 25:23, 27:29, 20:25, 15:10) në sete.
Me këtë fitore Drita ka ngushtuar epërsinë 2:1 ndaj Skenderajt, ekip që është vetëm një fitore larg titullit. Tani seria e ndeshjeve do të zhvendoset në Skenderaj, ku të premten mbrëma do të zhvillohet ndeshja e katërt dhe ekipi vendas ka edhe një mundësi për t’u shpallur kampion. Skenderaj është në kërkim të titullit prej vitit 2015, ndërsa Drita ka qenë forcë dominuese në volejbollin e femrave, ku në shtatë edicionet e fundit është shpallur gjashtë herë kampione.
Ndeshja e tretë, ku ishin të pranishëm rreth një mijë tifozë në palestër, zgjati për më shumë se dy orë dhe ishte e mbushur me emocione e adrenalinë.