Ilir Selmani do të jetë trajner i Trepçës për pjesën e mbetur të këtij edicioni në Superligën e Kosovës në basketboll. Ekipi mitrovicas nëpërmjet një njoftimi të mërkurën ka konfirmuar largimin e turkut Engin Gençoglu, si dhe zëvendësimin e tij me Selmanin, i cili ishte asistent. Kështu që, Selmani do ta udhëheqë ekipin prej ndeshjes së tretë të serisë finale që luhet të enjten mbrëma në Mitrovicë. Ai u pat emëruar trajner i parë i Trepçës për një kohë të shkurtër përpara se të vinte Gençoglu për të mbetur asistent i tij.
Gençoglu mori drejtimin e Trepçës në janar në këtij viti, duke e zëvendësuar Alek Jonçevskin e larguar. Nën drejtimin e Gençoglut, skuadra nga Mitrovica triumfoi në Kupën e Kosovës, si dhe ka arritur në finalen e plejofit të Superligës, ku po përballet me Pejën. Pas dy ndeshjeve në këtë seri finale, rezultati është 1:1, ndërsa ndeshja e tretë zhvillohet të enjten mbrëma në Mitrovicë. Skuadra që shënon tri fitore në këtë seri, do të shpallet kampione e Kosovës.
Trepça nuk e ka fituar titullin e kampionit prej vitit 2012, ndërsa Gençoglu ishte trajneri i tretë në krye të ekipit këtë edicion. Trepça e nisi edicionin me bullgarin Lubomir Minchev, i cili u largua.